BUTUAN CITY – Laing duha ka patay’ng lawas gikan sa 9 ka missing nga mga crews sa LCT Cebu Great Ocean barge ang napalgan kaganinang buntag sa mga rescuers nga padayong nangita kanila sa kadagatan ug kabaybayunan sa mga lungsod sa Malimono ug San Francisco, Surigao del Norte.
Sa eksklusibong pakighinabi sa Bombo Radyo Butuan, gipadayag ni Coast Guard Station Surigao del Norte commanding officer Elaine Pangilinan nga pasado alas-5 kaganinang sayo sa buntag napalgan ang maong mga patay’ng lawas human midagsa sa Purok 5, Brgy. Oslao, lungsod sa San Francisco.
Tungod niini, mi-abot na sa unom ang ilang narekober nga mga patay’ng lawas samtang nagpabiling pito ang narekober ug pito na lang ang missing.
Bisan og upat ka adlaw na ang nakalabay human nag-abandon ship ang 20 ka mga crews pagpanguna ni ship captain Mario Palacio, mala-umon gihapon sila nga mapalgan nilang buhi ang laing pito.
Nakig-alayon na ang tag-iya sa maong barge ngadto sa kabanay sa ilang mga crews aron ila nang madala sa ilang tagsa-tagsa ka pinuy-anan.
Sa pito ka mga survivors, duha na ang naka-uli sa ilang pinuy-anan rason nga lima na lang ang anaa karon sa Caraga Regional Hospital sa Surigao City.
