BUTUAN CITY – Gipanghimakak ni P/Insp. Joselito de los Santos, hepe sa kapulisan sa La Paz, Agusan del Sur ang nanggawas nga mga balitanga duna’y presensya sa mga membro sa teroristang grupong Maute didto sa Brgy. Casapa.
Gibutyag sa opisyal nga human nakadawat og tip kalabot sa maong impormasyon, dali gilayon nila kining gipaberipika og nasuta nga mga lumad lang ang anaa sa maong dapit.
Apan abisan pa man, padayon ang ilang pag-monitor aron masegurong dili sila masudlan og Maute.
Ang ilang nakuhang impormasyon, duna’y nang-recruit sa maong lugar apan alang lang kini sa trabaho.
Gidugang sa opisyal nga dili usab tinuod ang nanggawas nga hungihong nga ideklarang no man’s land ang ilang lungsod aron mahipos na ang mga Maute members nga nakasulod na matud pa.
Gani, bisan ang hepe sa Bravo company sa Philippine Army nga ilang counterpart, wala maghisgot niini ngadto kaniya. (Beth Ruiz)
