BUTUAN CITY – Business as usual pa gihapon ang La Carlota City, Negros Occidental taliwala pa man sa pagbuto sa bulkang Kanlaon kagahapong adlawa.
Sumala ni Hannah Kissah Campus, residente sa maong syudad, nagpabilin pa gihapon ang inadlaw-adlaw nga gimbuhaton sa mga tawo sa ilang syudad tungod kay dili man dako ang kadaot nga nahatag sa maong pagbusikad sa city proper.
Apan wala gihapon nagkumpyansa ang ilang lokal nga kagamhanan tungod kay pipila sa mga barangay sa ilang syudad ang apektado gayud sa ashfall hatud sa maong pagbuto, diin apil ang mga sakyanan ug mga atup sa kabalayan, naputos na sa abo gikan sa bulkan.
Sumala ni Campus, wala’y angay kalabak-an tungod kay napangandaman na kining daan sa ilang kagamhanan, ilabina ang pagdagsang sa mga evacuees sa mga eskwelahan rason nga ning panahona, naka-eskedyul na ang klase sa mga kabataan matag-semana aron ma-cater ang mga nanghikling sa mga eskwelahan.
Dako usab ang kalipay sa katawhan sa maong syudad human sila gi-ulan kagahapon tungod kay nakatabang kini pag-washout sa mga abo sa kadalanan.
Nasayrang nakasinati og halos usa ka oras nga pagbuga sa 4000 metros nga abo ang maong bulkan kagahapong adalwa, diin ang maong abo, napadulong sa mga kasikbit nga lugar ilabina sa La Carlota City.
