BUTUAN CITY – Usa ka buwan nang nagpahigayon og online classes ang tunghaan nga gitudluan ni Bombo international correspondent Ferdinand Nakila sa Los Angeles, California tungod sa gipatumang lockdown nga mugna sa COVID-19 pandemic.
Sa eksklusibong pakighinabi sa Bombo Radyo Butuan, gipadayag ni Nakila nga taga-Cabadbaran City, Agusan del Norte nga migamit sila sa e-learning platform nga Zoom diin makapili sila kung unsa ang angayang buhaton apan mas gipili niya ang paggamit sa Schoology nga maoy platform sa ilang schools district.
Dinhi matud pa niya ipang-upload ang iyang mga links ug instructional videos apan sa Zoom sila mag-live samtang kada-adlaw usab siya maghatag og assignments kansang tubag sa iyang mga estudyante ipasa matag-weekend.
Aminado si Nakila nga naglisod pa sila pag-adjust sa set-up nila karon rason nga nadoble na hinuon ang ilang trabaho tungod kay apil ang mga ginikanan sa iyang mga estudyante nga gustong mutabang pagtudlo, iya man usab nga tudluan.
Gidugang sa magtutudlo nga dili malikayang duna’y pipila ka mga Asians nga nakasinati og bullying ilabina kadtong mga Chinese-looking tungod sa kamatu-urang gikan sa Wuhan, China ang coronavirus.
Ang maong racial discrimination misamot matud pa dihang gitawag ni US President Trump ang COVID- 19 nga Wuhan virus. Apan sa iyang klase, matag-karon og unya niyang gipahinumdom ngadto sa iyang mga estudyante nga likayan kini ilabina nga daghan siya og mga estudyanteng Koreano tungod kay duol man sila sa Korean town.
