BUTUAN CITY- Narekober na sa kapulisan ang usa ka kutsilyo nga gituohang gigamit sa brutal nga pagpatay sa 11-anyos nga si Jefferson Taliman atol sa follow-up investigation niadtong Abril 17, 2026.
Sumala ni Police Lt. Col. Atty. Mariano Lukban, mibalik sa lugar ang mga imbestigador uban ang Intel ug Theft and Robbery Unit (TRU) aron subayon ang gi-agian sa 17-anyos nga Child in Conflict with the Law kon CICL suspect. Didto sa riverside area, usa ka residente ang mitudlo sa kapulisan sa kutsilyo nga iyang nakit-an sa suba panahon sa low tide.
Base sa CCTV footage, nasuta nga gikan sa Tom’s World sa Gaisano ang biktima ug ang suspect dayong lakaw padulong sa national highway hangtod sa riverside area diin gituohang nahitabo ang krimen. Ang suspect, nasuta nga residente sa Loreto, Dinagat Islands, adunay daan nang record ug usa sa mga menor de edad nga nakasibat sa Bahay Pag-asa niadtong Abril 6. Gani nasikop na kini niadtong Abril 13 sa usa ka internet café ug karon kasamtangan nang naka-kustodiya sa kapulisan.
Base sa autopsy, gikumpirma nga ang biktima namatay tungod sa duha ka grabeng samad dinunggaban nga milapos hangtod sa baga. Samtang, padayon pa usab ang gihimong imbestigasyon sa mga autoridad aron mapalig-on pa ang ebidensya ug masiguro ang hustisya alang sa biktima samtang giandam ang kasong murder batok sa menor de edad nga suspect.
Kahibaloan nga gikatahong na missing ang maong biktima niadtong Abril 9 ug nakit-an nga wala nay kinabuhi niadtong Abril 12 sa kasagbutan diin asa anaa na kini sa advanced state of decomposition o pagkadugta.
