BUTUAN CITY – Nangindahay gihapon si Elson Ubatay, residente sa Purok 9, Brgy Kahusayan, lungsod sa Kitaotao, Bukidnon nga makita na ang iyang ginikanang sila Thelma ug Ely Ubatay human nahulog uban sa ilang bajaj o bao-bao atol sa landslide kagabii sa Kipolot–Palacapao Road duol sa Overview Nature and Culture Park sa lungsod sa Quezon sa susamang lalawigan.
Sa eksklusibong pakighinabi sa Bombo Radyo, gipadayag ni Elson nga pa-uli na unta ang iyang mga ginikanan gikan namaligya og gulay sa tabuan apan wala na maka-abot pa sa ilang pinuy-anan.
Ang ila na lang matud pang silingan ang nagpahibalo kanila kagabii nga duna’y bajaj nga nahulog og nakita nga ang plaka, mao ang plate number sa sakyanan sa iyang ginikanan.
Mas nakumpirma pa nga ila kining sakyanan dihang gihimo na ang search and retrieval operation kaganinang buntag human naklaro ang plaka niini kondiin anaa na sa taas nga bahin ang mga ligid niini apan wala ang iyang mga ginikanan.
