BUTUAN CITY – Midepensa ang driver sa usa ka 10-wheeler truck nga nalambigit sa vehicular accident kaganinang kaadlawon sa may Macapagal Bridge nga dapit na sa Brgy. Bingkilan ning siyudad nga miresulta sa pagka-ipit diha sa manibela sa driver sa misungag nga kotseng Mitsubishi Mirage.
Sa eksklusibong interbyu sa Bombo Radyo Butuan, gibutyag sa driver nga si Joven Amon, 25-anyos, duna’y ka-ipon ug residente sa Zamboanga City, nga distansya pa lang nakita na niyang dili maayong dagan sa nasangpit nga sakyanan.
Tungod kay dili na siya makalikay pa tungod sa kawala’y lugar sa tulay, napugos siya paghunong ug pagsige og silbato apan midasmag gihapon sa iyang gimanehuang trak ang biktimang si Carl Steven Dagooc, 24-anyos, ulitawo ug mulupyo sa Purok 2 Brgy. Taligaman ning siyudad kinsa nagpa-alim na sa ospital.
Migawas sa inisyal nga pakisusi sa kapulisan nga gikan nag-inom og dyutay sa party ang biktima.
