BUTUAN CITY – Anaa na sa 85-porsientong natapos ang konstruksyon sa ubang mga pasilidad sa sports complex sa Agusan del Sur nga migasto na og 686,000,600-pesos gikan sa pundo sa lalawigan pinaagi sa general fund uban sa loan.
Sigon ni provincial Engr. Virgie Urbiztondo, ang ubang parte niini natapos na sama sa world class football field kansa usa ka grass court ingon man rubberized oval.
Sa eksklusibong pakighinabi sa Bombo Radyo Butuan, gipadayag ni Engr. Urbiztondo nga ang padayon pa nilang gitrabaho mao ang aquatic swimming pool partikular ang water-proofing niini.
Gi-andam kini sa probinsyal nga panggamhanan aron maka-host sa mga national events sama sa Palarong Pambansa ug uban pang mga sporting events.
Ang ilang padayong gi- construct usab nga grandstand, maka-akomodar og 3-mil ka mga indibidwal wala pa’y labot sa 1,500 nga capacity sa aquatic center diin makita ang world-class standard swimming pool.
Plano sa lokal nga kagamhanan sa lalawigan nga mag-apply og accreditation alang pag-host unya nila sa Federation Internationale de Football Association kon FIFA.
