BUTUAN CITY – Kasong reckless imprudence resulting to homicide ang gipasaka sa kabanay sa usa ka barangay kagawad sa lungsod sa Placer, Surigao del Norte human kini naligsan-patay sa usa ka de-pasaherong van ning mi-aging gabii.
Gi-ila ni SPO1 Joey Turnowas sa Placer Municipal Police Station ang biktimang si Joel Donque Jamorol, 76-anyos, residente sa Purok 1, Brgy. Mabini, lungsod sa Placer, Surigao del Norte samtang ang suspek nailang si Donald Lamela Quezada, residente sa Purok-5, Brgy. Silop, Surigao City.
Migawas sa ilang imbestigasyon nga padulong unta dinhi sa dakbayan sa Butuan ang van nga puno sa mga pasahero apan pag-abot sa National Highway sa Mabini, Placer, mutabok gihapon sa dalan ang konsehal taliwa nga iya na kining gisilbatuhan hinungdan sa pagkasapon niini sa iyang sakyanan.
Gidala pa ang biktima ngadto sa Surgao del Norte Provincial Hospital apan gideklara kining dead on arrival sa attending physician.
Boluntaryong mitahan ang driver ngadto sa Placer Municipal Police Station uban sa iyang sakyanan alang sa tukmang disposasyon. (Beth Ruiz)
