BUTUAN CITY – Gipasakahan og reklamo sa Office of the Ombudsman sila Malabon Rep. Jaye Lacson-Noel, bana niining si kanhe An Waray Rep. Florencio ‘Bem’ Noel ug ang kagawad nga si Romulo Cruz.
May kalabutan kini sa matud pa repacking sa mga relief goods gikan sa Department of Social Welfare and Development (DSWD) para sa mga apektado sa bagyong Carina.
Sumala sa complainant nga si Rogelio Gumba, siya mismo ang gitahasan sa congresswoman nga mukuha og mga family food pack para sa matud pa repacking activity.
Saysay niini, kadaghanan sa mga food packs gidala sa headquarters ni Lacson-Noel sa Malabon ug gidala usab sa Brgy. Longos, Hulung Duhat ug Tinajeros ang uban pa.
Gipanghatag sa magti-ayon ang repacked nga plastic bags ug wala na matud pa nahatag ang gilakip nga canned goods.
Dugang pa niini mitabang usab si Kagawad Cruz sa repacking ug gipa-ambit pa kini sa internet. Para kang Gumba, tataw nga kaso kini sa Qualified Theft ug pagsupak sa Republic Act 10121 o Philippine Disaster Risk Reduction Management Act of 2010.
