BUTUAN CITY – Nagmugna na karon og task force ang lokal nga kagamhanan ning syudad sa Butuan nga maoy gitahasan paghimo og bag-ong route plan alang sa mga kolor orange nga traysikol nga ma-apektuhan unya sa pag-ban na kanila pag-agi sa national highway sugod karong Lunes, Marso 1.
Sigon ni Association of Barangay Captains kon ABC Butuan City Federation President Gemma Tabada, gituki na nila kini nga isyu atol sa ilang ikaduhang regular meeting ilabina nga gikonsidera kining problema sa mga hingtungdang drivers ug operators tungod sa kabalakang mawad-an na sila og panginabuhian.
Sa eksklusibong pakighinabi sa Bombo Radyo Butuan, giklaro ni Baan Km. 3 Brgy. Kapitan Gemma Tabada nga padayon gihapon silang makapamasada ubos sa kondisyong sundon gyod ang joint memorandum circular sa Department of Interior and Local Government kon DILG ug Department of Transportation kon DOTr nga dili mu-agi sa national highway aron masiguro ang kaluwasan sa tanang mga sakay niini.
Sigon ni Kapitan Tabada, karaan na kaayo ang maong balaud rason nga gimando sa DILG nga ipatuman na kini sa hingpit sugod karong Lunes ug andam na ang siyudad pagpatuman niini.
Ang kabalaka karon sa mga apektadong drivers ug operators, mugna lang matud pa sa miscommunication.
Gidugang pa ni Kapitan Tabada, ang Liga ng mga Barangay maoy gitahasan sa city government nga mupasabot sa kabaranggayan ug mukuha sa ilang mga yangungo aron maoy basehan sa amendahan unya nilang karaang city ordinance nga nagdili sa kolor orange nga mga traysikol pag-agi sa national highway apil na sa tulay Magsaysay.
Gipasabot pa ni Tabada, dili lakip sa gi-ban ang mga traysikol nga kolor green ug yellow tungod kay wala man kini malakip pag-ban sa daang city ordinance ilabina nga executive order lang ang gipagawas sa buhatan sa mayor alang sa pagpatuman na sa joint memorandum circulars nga gipagawas sa DILG ug DOTr alang niini.
