BUTUAN CITY – Tungod sa kusog nga pagbundak sa ulan nga hatud sa nagtunhay’ng low pressure area, suspendido ang klase sa Surigao City kagahapon sa hapon.
Sa gipagawas nga Executive Order No. 11 series of 2020 ni Surigao City Mayor Ernesto ‘Estong’ Matugas, nakalatid nga lakip sa wala’y klase ang mga pre-schools, elementarya ngadto na sa mga sekondaryang tunghaan – pribado man o pampubliko.
Kini tungod na usab sa hulgang hatud alang sa posibleng kalit nga pagbaha ilabina sa mga low-lying areas ingon man posibleng pagdahili sa yuta sa mga lugar nga anaa sa tiilan sa bukid sulod sa maong siyudad ug sa kasikbit nga mga lungsod nga sakop sa lalawigan sa Surigao del Norte.
Tumong niini nga maprotektahan ang kaluwasan sa mga estudyante kansa maoy prayuridad sa mga local nga kagamhanan ilabina panahon sa mga kialamidad. Ipahibalo ra usab sa mayor ang eskedyol sa pagbalik sa klase kung mumaayo na ang lakat sa panahon.
Samtang gi-isa na karon sa alert level 3 ang entiro siyudad sa Surigao human gipagawas sa Philippine Atmospheric Geophysical Astronomical Services Administration kon PAGASA ang Heavy Rainfall Warning No.3 sa alas-onse sa buntag.
Kini nagpasabot nga ang entiro siyudad anaa na sa red rainfall warning alang sa kusog nga pag-ulan nga maghatag ug hulga sa pagbaha sa mga low-lying areas ingon man landslides diha sa mga bukirang bahin.
Gawas sa Surigao City ug lalawigan sa Surigao del Norte, gi-isa na usab karon ang red rainfall warning sa mga lalawigan sa Surigao del Sur og Agusan del Sur.
Samtang wala usa’y klase kagahapon sa mga lun gsod sa Carrasscal ug Cantilan sa Surigao del Sur.
