BACOLOD CITY – Nakanselar ang klase sang Patricia Homes Elementary School sa Barangay Granada ciudad sang Bacolod kaina bangod sang baho nga nagsungaw nagikan sa planta sang San Miguel Brewery.
Suno sa school principal nga si Vivian Cawaling nagsugod ang pagsungaw sang baho alas 10:00 sang aga nga daw kasubong sang tuman ka baho nga imburnal.
Sa sini naggilinuwa sa ila hulot-klasehan ang mga estudyante kag nagareklamo sang pagsakit sang dughan, naga lingin ang ulo kag daw masuka.
ang iban naman ang naghilinibi bangod sa kakulba rason nga ginkanselar sini ang klase kag ginpapauli ang mga ini.
Gilayon naman ini nga nagpakig-angot sa tagdumalahan sang brewery kag nahisayran nga nagpangbutang ang mga ini sang citronella bilang insect repellant batok sa dengue matapos ang ginpatigayon nga flood flushing.
Suno naman kay Cawaling nga posible nasobrahan ang kadamuon sang amo nga spray nga nagtuga sang masakit sa ulo kag dughan nga baho.
Nahibaluan nga naka-agi naman nga nag leak ang amonia sa amo nga planta sa diin pila ka mga estudyante ang nagkalalipong kag gindala sa ospital.
Buas nga adlaw liwat nga magapakigsapol si Cawaling sa tagdumalahan sang brewery agod hambalan ang mga precautions nga indi na masulit ang kasubong nga hitabo.
Samtang nagpadulong man sa lugar ang City Health Office agod mag-imbestigar.
