BUTUAN CITY – Masaksihan karong adlawa ang grand coronation alang sa pilion unyang mahimong Man of the Globe Philippines 2021.
Sa maong male pageant, dako ang tsansa sa pambato sa Caraga Region nga mao ang Agusanong si Kirby Torrefranca Bas nga makasakmit sa titulo human siya nahimong top pick sa Top 7 sa mga contestants.
Kini human usab nga nanganawkanaw ang iyang national costume kumpara sa ubang mga contestants kansa nagpakita sa abundang kolor sa mga tribu sa Agusan del Sur ug naghatag og dugang puntos rason sa pagpanguna niya sa Top 7.
Sa eksklusibong pakighinabi sa Bombo Radyo Butuan, nanawagan kini nga tabangan siya sa pag-ampo nga makuha sa Caraga Region ang unang titulo alang sa nasangpit nga national male pageant.
Ang mudaog sa maong pageant, dalhon unya sa India alang na sa pangkalibutanon na nga hugna niini. Virtual lang ang pagpahigayon sa maong pageant karong tuiga tungod sa padayong hulgang hatud sa COVID-19.
