BUTUAN CITY – Gitoohang dakong kawad-on sa rebelding New People’s Army kon NPA ang kinarton nga mga buhing bala ug mga armas human kini nakumpiska sa militar atol sa ilang panag-engkuwentro sa niaging adlaw sa Sitio Paradise, Brgy. Del Monte, Veruela, Agusan del Sur.
Sa impormasyong nakuha ning sibyahan, usa ka taho gikan sa nagpakabanang lumulopyo ang gipaabot sa mga elemento sa 26th Infantry Battalion nga dunay armadong grupo nga gitoohang miyembro sa Guerrilla Front 3 sa Southern Mindanao Regional Committee sa NPA, ang nagloblob sa maong lugar.
Gelayong mireponde ang militar aron beripikahon ang maong impormasyon. Apan sa pagpadulong palang sa tropa sa kagamhanan, naka-agbat na kini ug engkuwentro batuk sa armadong grupo nga mi-atras usab ngadto sa bukirang parte sa maong lugar.
Gigukod kini sa mga sundalo ug didto nadiskubre ang 2 ka karton nga puno sa 3-mil ka mga buhing bala sa M-16, usa ka kalibre 30 carbine rifle, duha ka KG9 submachine-guns, usa ka ARMSCOR cal. 22 rifle nga dunay scope, usa ka kompletong set sa Improvised Explosive Device kon IED ug duha ka magazines sa AK47 rifle nga dunay buhing bala.
Ang nasangpit nga mga armas ug bala, nakumpiska human gibiyaan sa rebelding NPA.
