BUTUAN CITY – Hugot nga gikondena sa Kilusang Magbubukid ng Pilipinas kon KMP ang pagbansag sa National Task Force to End Local Communist Armed Conflict kon NTF-ELCAC, sa ilang grupo nga front organization sa communist terrorist group kon CTG.
Sa eksklusibong pakighinabi sa Bombo Radyo Butuan, gibutyag ni KMP chairman Danilo Ramos nga malisyuso, peligruso ug wala’y basehan ang pronouncement sa task force atol sa ilang national executive meeting.
Ang pag-red tag matud pa sa administrasyon ni Pangulong Ferdinand Marcos Jr. uban sa militar, kaluha na ang extra judicial killings, butang-butang nga mga akusasyon, pagpangdagit ug uban pa.
Kini napamatud-an na matud pa sa pIpila ka mga natalang kaso sa extra judicial killings ug pagpangdagit sa mga indibidwal nga biktima sa red tagging.
Sigon ni Ramos, kini ang hinungdan nga ilang giuportahan ang panawagang bungkagon na ang nasangpit nga task force apil na ang pag-amenda sa Anti-Terrorist Act of 2020.
Dako ang pagtuo ni Ramos nga ang pag-red tag kanila duna’y kalambigitan sa ka-aktibo nilang pagsaway sa mga nagapanghitabo karon sa nasud ilabina sa gobyerno tungod sa nagkagrabe karon nga kahiwian sa nagkada-iyang ahensya sa gobyerno ug ilabina ang pagsupak nila sa gihingusgan kaniadtong people’s initiative nga paagi sa pag-amenda sa Konstitusyon.
