Killer sa Laguna, nadakpan sa Agusan del Norte tungod sa FB post

BUTUAN CITY – Naghulat na lang og dugang kamanduan ang Criminal Investigation and Detection Group kon CIDG-Caraga alang sa sunod nga lakang nga himuon batuk sa wanted person sa Laguna nga pito ka tuig nga nagtago og nadakpan sa Agusan del Norte sa tabang sa Facebook post.
Sigon ni P/Chief Insp. Choli Jun Caduyac – CIDG-Caraga regional chief, nahimong dalan sa pagkasikop ni Victor Abonales Jr., 29-anyos nga residente sa Brgy. Colorado lungsod sa Jabonga sa maong lalawigan ang post sa igsoon sa tawong iyang gipatay nga migamit lang og dummy account sa Facebook.
Sigon sa opisyal, kabahin lang sila sa nakakita sa maong post hinungdan nga mihimo usab sila og kaugalingon nilang lakang kansa wala damhang makabaton og positibong resulta dihang nasayran ang nahimutangan sa suspek.
Dali silang mihimo og raid sa balay sa suspek bitbit ang arrest warrant nga gipagawas sa Biñan Regional Trial Court sa kasong murder nga miresulta sa iyang pagkasikop.
Aminado ang opisyal nga dakong tabang sa maong kaso ang Facebook post dungan sa panawagan nga angayang gamiton sa saktong paagi ang social media sama sa nahitabo karon. (Beth Ruiz)