BUTUAN CITY – Hingpit nang nadawat ni Joel Padrelana sa Brgy Holy Redeemer ning siyudad sa Butuan ang 35 ka ginabas nga kahoy’ng Tibo nga gidonar sa Taligaman Agrarian Beneficiaries Farmers’ Cooperative kon TAGBEFAMCO.
Kini human natandog ang kasing-kasing sa mga membro sa kooperatiba dihang nasayran pinaagi sa Bombo Radyo Butuan nga human na-apil ang iyang panimalay sa mga nasunog niadtong mismong adlaw sa Pasko, namatay pa ang iyang 14-anyos nga anak nga lalaki sa unang adlaw mismo sa bag-ong tuig 2026.
Sigon sa chairman sa kooperatiba nga si Milagros Diez, ila nang gitugyan ngadto sa barangay council sa Holy Redeemer ang maong mga kahoy aron sila na usab ang musalo sa pwede pa nilang matabang alang sa pagpabarog sa balay sa pamilya Padrelana. Kini subay na usab sa tinguha nga makatabang sa ilang constituent sama sa ilang pagtabang bisan og dili nila kini tagi-barangay.
Gawas niini, nanghinaut pa si Diez nga sunod nilang ma-abag ang pagtabang usab sa asawa ni Padrelana kinsa na-depress sa maong hitabo. Paningkamutan usab nila nga mamaayo kini gamit ang managlahing paagi.
Gipasalamatan niini ang Bombo Radyo Butuan nga nahimong dalan alang sa malampuson nilang tinguha nga makatabang s anasunugang pamilya.
