BUTUAN CITY – Sa-ulugon gihapon sa walhong grupo nga Communist Party of the Philippines–New People’s Army kon CPP–NPA ang ilang ika-57 nga anibersaryo karong Disyembre 26, bisan pa sa padayon nga paghuyang sa ilang pwersa ug impluwensya sa katawhan.
Sumala ni Ka Bom, kanhi lider sa mga rebelde ug karon nagpuyo nang malinawon, wala’y nahimong maayong kalihokan ang walhong grupo gawas lang sa kanunay nga pagsamok-samok sa katawhan.
Gipasabot usab niini, nga ang kunohay pagsa-ulog sa anibersaryo, usa lamang ka dakong binuang aron makapangayo og materyal ug pinansyal nga suporta sa katawhan kansa usa ka dakong binuang ug tinunto, matud pa.
Matag anibersaryo matud pa, kung adunay supply, maghinakotay og pangayo, ug ang masa maoy mahimong makaluluoy.
Padayon usab matud pa ang ilang propaganda aron ipakita nga buhi pa ang CPP-NPA taliwa sa kawala nila’y na-angkong kada-ugan.
Nanawagan usab si Ka Bom, ngadto sa mga kanhi ka-ubanan niining wala pa misurender unahon ang kaayohan sa ilang kaugalingon ug sa katawhan. Mipahimangno usab kini, nga dili na hasulon ang kaugalingon sa pag-organisa nga musangpot ra sa walay kadangatan.
