BUTUAN CITY – Gihukman og silot kamatayon ang kanhi presidente sa Democratic Republic of Congo nga si Joseph Kabila tungod sa mga kasong war crimes ug treason nga iyang gi-atubang.
Ang maong mga kaso duna’y kalabutan sa mga akusasyon nga gisuportahan niini ang rebeldeng grupong M23, kansa nagsabwag og lapad nga kagubot sa eastern region sa maong nasud. Nakonbikto si Kabila sa military court sa kasong treason kon paglu-ib, crimes against humanity, war crimes, apil na ang pagpatay, sexual assault, torture ug insurrection kansa pareho niyang gipanghimakak apan wala kini mupatim-aw sa korte aron unta depensahan ang iyang kaugalingon.
Gi-deadma lamang sa kanhi presidente ang maong kaso dayong tawag niining arbitrary dungan sa pagpadayag nga gigamit ang maong korte isip instrumento sa pag-oppress kaniya.
Hangtud karon, wala pa masuta kung asa nahimutang ang kanhi presidente. Gimanduan usab siya sa korte nga mubayad sa multa nga 33-bilyunes dolyares kon bugti sa kapin 1.9-trilyunes pisos.
Sigon sa usa sa iyang mga ka-alyado ug kanhi minister nga si Kikaya Bin Karubi, “theatrical” ang kinatibuk-ang pagtaral ug ehemplo sa diktadoriya ni President Félix Tshisekedi taliwa nga wala’y nakita ang korte nga bisan unsang ebidensya nga nagkutay kang Kabila ngadto sa M23 rebel group.
