BUTUAN CITY – Pasakaan og kasong libel ni Senador Bong Revilla ang mga indibidwal nga nagpakuyanap matud pa og pekeng balita mahitungod kaniya niadtung 2025 Local and National Midterm elections.
Sumala sa Senador, ang maong mga pekeng balita maoy hinungdan nga napildi siya sa Senatorial race. Sigon sa legal counsel sa Senador nga si Atty. Reymond Fortun, pabilin matud pang kuyanap sa social media ang mga balita nga nasentensyahan si Revilla, ug gipabayad pa og balor 124.5-milyon Pesos bugti sa gikawat niining pondo sa Priority Development Assistance Fund (PDAF) bisan nga na-acquit na kini sa mga kasong may kalabutan sa kurapsyon niadtung 2018, dihang nagpagawas og desisyon ang Sandiganbayan Special First Division nga wala matud pa napamatud-an sa prosecution nga sad-an ang Senador.
Sumala ni Revilla sa usa ka interview, dili matud pa siya depressed tungod sa iyang kapildihan, apan nasubo siya sa resulta, kansang rason mao ang nahisgutan nga mga misinformation batok kaniya. Lakip sa mga fake news nga ningkuyanap batok kang Revilla mao ang post nga suportado matud pa niini ang death penalty alang sa mga kurap, ingon man ang quote card kansa nagtaho nga dili matud pa niya i-uli ang 124 million pesos.
Lakip sa mga pakasohan sa kampo ni Revilla mao ang mga vloggers, social media users, ingon man mga website owners kansa nagpublisar sa nasangpit matud pa nga mga bakak.
