BUTUAN CITY – Dila lang ang wala’y bun-og sa usa ka kawatan human kini nakahi-agom og kulata heneral sa mga tawong nakasapon sa iyang gihimong pagpangawat pasado alas-dos sa kaadlawon.
Nagpa-ila ang naposasang kawatan nga si Nono Aguilar, 26-anyos, residente sa Purok 8, Brgy. Andanan, Bayugan City sa lalawigan sa Agusan del Sur.
Migawas sa inisyal nga imbestigasyon nga mitawag matud pa kang Remegio Paler ang iyang silingan sa Purok 20, Brgy. Baan Km. 3 ning siyudad og gipahibalo nga gikawat ang iyang car wash machine.
Dihang gitan-aw kini ni Paler, iyang na-aktuhan ang suspek nga mipas-an sa maong makina rason nga misinggit kini og kawatan nga miresulta sa pagpanggawas sa ilang mga silingan og gigukod ang suspek.
Human gikulata, gigaid gilayon ang iyang mga tiil og mga kamot og daling gidala sa Butuan City Police Station 1 alang sa tukmang disposasyon.
