BUTUAN CITY – Gi-angkon ni Kate Middleton, ang Princess of Wales, nga nakahimo siya og maayong kalambuan sa panglawas human sa iyang cancer diagnosis dayong saad nga mutambong sa Trooping the Colour ugmang adlawa, Dominggo.
Kini unya ang iyang unang public appearance karong tuiga human sa diagnosis ug sa iyang abdominal surgery niadtong Enero.
Apan sa usa ka personal message, gipadayag ni Catherine nga magpadayon ang iyang treatment alang sa musunod nga mga semana.
Gikuhaan og hulagway ang prinsesa sa photographer nga si Matt Porteous, nga nagpakita kaniya duol sa iyang pinuy-anan sa Windsor.
Gipadayag pa niini nga nasayod ang tanan nga ang si bisan kinsa nga mipa-ilalom sa chemotherapy, duna’y maayo ug dili maayong adlaw.
Sa mga dili maayong adlaw, iyang gipasabot nga anaa ang kaluya, kakapoy, ug kinahanglan nga ipahulay ang lawas apan pag-abot sa adlaw nga maayo, bation usab ang maayong panglawas.
Nakakat-on matud pa siya kung unsaon pagpasensya ilaina sa mga adlaw nga wala’y kasiguruhan.
Kada-adlaw nga mu-abot kaniya, iya matud pang gipaminaw ang iyang lawas ug tugutan ang iyang kaugalingon nga mahatagan og higayon ang pagpaka-ayo.
