BUTUAN CITY – Atubangon ni Maximo Ramirez ang kasong murder tungod sa iyang pagtigbas-patay sa iyang uyoan nga Purok President sa Purok-5C Brgy. Antongalon, ning dakbayan sa Butuan nga si Pablo Roca.
Sumala ni PCAPT Charles Evan Gatchalian, acting station commander sa Butuan City Police Station 4, gibutang nila sa elements sa maong kaso nga ningamit ug sundang sa maong kremin ang maong suspetsado, ingon man walay ikasukol ang biktima tungod kay tigulang na kini.
Dili usab mahimong parricide ang ipasaka nila nga kaso sanglit dili man kini ma-apply sa mag-agaw o kaha mag-uyoan.
Una nang gisaysay sa responsable sa pakighinabi ning sibyahan nga napukaw ang iyang kasuko ngadto sa iyang uyuan human siya gikasab-an tungod sa wala lang niya pagpasiga sa suga sa poste diha sa dalan dool sa ilang balay.
Depensa pa niini, wala siya mahibalong duna diay kini bag-ong bombilya nga gitaod. Gihagit matud pa siya sa biktima nga pagawason sa ilang balay, nga niadtong higayona nagbitbit na ug bato.
Dinhi na siya migawas sa balay nga dunay dala nga sundang og gitigbas ang biktima.
Aminado ang responsable nga nagbasol siya sa iyang nabuhat dayung butyag nga atubangon niya ang silot nga ipahamtang ngadto kaniya.
