Gihikay na sa mga otoridad ang pagpasaka og kaso batok sa 23-anyos nga si alyas Sultan Kinento, residente sa Taguig City, human masakmitan og 95.2 milyones pesos nga kantidad sa suspected shabu nga gisulod sa ligid sa sakyanan atol sa operasyon sa Lipata Port, Surigao del Norte.
Sumala ni Dindo Abellanosa, tigpamba sa Philippine Drug Enforcement Agency kon PDEA-Caraga, nga ang suspetsado nag-atubang na sa kasong adunay kalapasan sa Section 5 sa balaod o ang transportation of Dangerous Drugs.
Sigon pa niini, nga operasyon usa ka hiniusang kalihukan sa PDEA, Philippine National Police kon PNP, Philippine Maritime, Philippine Post Security, ingon man lokal nga kapulisan sa Surigao City.
Gibutyag usab ni Abellanosa, nga human masuta ang droga, gi-interview dayon ang suspek ug gipadayon ang lawom nga imbestigasyon aron masuta kung asa gikan ug asa padulong dalhon ang kontrabando samtang giandam na usab ang pormal nga pagsaka sa kaso sa Surigao City.
Dugang pa sa tigpamaba, nga pinaagi sa gihimong hini-usa nga operasyon sa nagkalain-laing drug enforcement units, malampusong na-intercept ang usa ka dako nga kantidad sa ilegal nga druga nga misangpot sa pagkasikop sa 23-anyos.
Sumala sa tigpamaba sa ahensya, kasagaran sa ingon nga mga operasyon naggikan sa sensitibong impormasyon nga gihatag sa mga nagkalain-laing tinubdan, apan dili na mahimong ipadayag kung kinsa o asa gyud kini gikan aron mapanalipdan ang seguridad sa mga nagreport ug maengganyo ang publiko nga magpadayon sa paghatag og impormasyon sa kapulisan.
Gilatid usab niini, nga diha-diha dayong gireport ang maong impormasyon sa mga parent agency ug dayon gipahigayon ang koordinadong operasyon aron ma-intercept ang kontrabando.
Gipadayag usab ni Abellanosa, nga wala na mingsukol pa ang suspek atol sa operation apan pinaagi sa Narcotics Detection Group ug sa tabang sa K-9 units, nasuta dayon ang presensya sa ilegal nga druga bisan pa nga gitago kini sa ilawom sa ligid.
Gipunting usab niini ang pamahayag sa Regional Director kansa dakong papel ang hugot nga koordinasyon sa matag unit—lakip na ang Philippine Coast Guard nga adunay kahibalo sa kadagatan, ang mga otoridad sa kadalanan, ug ang mga personnel sa pantalan—aron masiguro ang husto nga pagsunod sa protocol ug ang ligal nga pagkaaresto sa suspek pinaagi sa hini-usang pwersa sa nagkadaiyang ahensya.
