BUTUAN CITY – Nagpasidaan ang Commission on Population and Development (CPD) sa pagsaka sa kaso sa child pregnancies kon pagmabdos sa mga bata nga wala pa ka-abot og 15 anyos, bisan pa man og nagkakunhod ang kinatibuk-ang teenage pregnancy sa Pilipinas.
Base sa datos sa Philippine Statistics Authority (PSA), gikan sa 138,697 ka mga live births sa mga babayeng nag-edad og 10 hangtud 19-anyos niadtong 2024, mi-abot sa 3,612 niini gikan sa mga batang ubos sa 15 anyos kansa mas taas kumpara sa 3,343 niadtong 2023.
Sigon ni CPD Undersecretary Lisa Bersales, samtang nagkakunhod ang pagbuntis sa mga anaa sa edad nga 15 hangtud 19-anyos tungod sa mga programa sa gobyerno, nagkataas usab ang kaso sa mas bata nga grupo.
Lakip sa mga hinungdan niini ang kakabos, kulang nga oportunidad sa edukasyon, ug sayo nga exposure sa pakighilawas tungod sa social media.
Subay niini, gikinahanglan karon ang mas lokal nga mga solusyon, uban ang pagtambayayong sa mga lokal nga gobyerno ug barangay, ug paghatag og mga mensahe sa kabataan sa paagi nga ilang masabtan.
Dili lang daw dapat magpokus sa sex education, kundili apilon usab ang pagtudlo sa mga bata bahin sa ilang mga pangandoy ug tumong sa kinabuhi.
