BUTUAN CITY – Sadya ug malampusong nalusad sa lokal nga kagamhanan sa Butuan City ang Kasawa Hong Pasko Ceremonial Switch-On sa may Butuan City Hall Grounds.
Pasado alas-7:23 na kagabii hingpit nga gipasiga og dungan ang mga Christmas lights nga gimontar sa mga major thoroughfares ning siyudad sama sa Butuan City Hall ug unom ka mga overpasses.
Gidugok ang nasangpit nga seremonya sa bagang katawhan kansa gilingaw sa performance sa tulo ka mga local singers nga mihimo na og pangalan sa mga national ug international singing competitions human mikampyon sama nila Lance Busa nga mikampyon sa Bolt of Talent singing competition ni American singer Michael Bolton ingon man ang nahimong national champions nga sila Jason Dy ug Elaine Duran.
Mihatag usab sa iyang mensahe sa pasko si Butuan City Mayor Ronnie Vicente Lagnada diin nahimong sentro niini ang paghandum sa mga mahal sa kinabuhi nga dili makauban sa Pasko tungod sa nagkalain-laing rason.
Gipasalamatan sa mayor ang tanang katawhan nga mitambong og mitabang aron magmalampuson ang nasangpit nga seremonya. .
Lakip usab sa gipahigayon kagabii ang “Parolan Hong Barangay” Barangay Christmas Lantern Contest nga gi-apilan sa 86 ka mga barangays ingon man ang “Overpass Ko” Overpass Decoration Contest.
