BUTUAN CITY – Hingpit nang nahugno ang daang dakbalay sa kapulisan sa San Francisco, Surigao del Norte human ang 5.1 magnitude nga linog kaganinang alas-12:24 sa kaadlawon.
Base kini sa pagkumpirma ni P/Insp. Roberto Angob – hepe sa San Francisco Municipal Police Station sa eksklusibong interview sa Bombo Radyo Butuan. Iyang gisaysay nga ang maong karaan nilang building nga nahirig human sa linog niadtong Pebrero 2017, karon totally collapsed na.
Gawas niini, nag-brownout usab ang ilang lungsod nga nakadugang sa pag-panic sa mga tawo human nakamata apan mibalik ra paglabay sa 10-minutos.
Balik na sa normal ang inadlaw nga kalihukan sa tibuok lungsod ilabina ang dagan sa pamatigayon tungod kay wala’y mga tag-as nga dakbalay sa ilang lungsod.
Samtang gibutyag usab ni Surigao City Councilor Rise Recabo nga apil sa natalang damyos sa ilang siyudad ang bodega sa usa ka warehouse ingon man ang elevator sa Tavern hotel gawas sa pipila ka natumpag nga pader nga midat-og sa pipila ka sakyanan.
Gidugang sa konsehal nga ang pag-panic maoy magbutang sa delikado sa kinabuhi sa mga tawo human niya namatikdan atol sa linog nga naglumba pagpanagan ang halos 90-porsiento sa mga empleyado nila sa city hall rason nga duna’y uban nga nangatagak gikan sa second floor. (Beth Ruiz)
