BUTUAN CITY – Siento-porsiento nang andam ang Surigao Component City Police Station pag-secure sa mga delegasyon sa Caraga Regional Athletic Meet kon CRAM 2026 nga magsugod sa Marso 15 hangtud 20.
Sa eksklusibong pakighinabi sa Bombo Radyo Butuan, gipadayag ni station commander PLCol Mariano Lukban nga pila ka higayon na silang nagpahigayon og security briefing uban sa lokal nga kagamhanan sa siyudad ug lalawigan sa Surigao del Norte.
Mu-abot matud pa sa 20 ka mga tunghaan nga magsilbing billeting centers ang istaran sa gibana-banang 12-mil ka mga delegado ug ang matag-tunghaan, gibutangan nila og tag-pito hangtud tag-walo ka mga pulis. Lain matud pa ang mu-duty sa buntag ug gabii aron masiguro ang kaluwasan sa mga delegado ug ang ilang mga butang ilabina sa panahon nga duna sila’y duwa ug wala’y mabilin sa ilang mga quarters.
Laing mga pulis usab ang ipang-assign sa mga playing venues ka-uban ang ilang mga counterparts sama sa kasundaluhan, mga bombero, taga-City Disaster Risk Reduction and Management Office kon CDRRMO ug uban pang mga force multipliers.
