BUTUAN CITY – Gipa-abot pa sa kapulisan sa Loreto, Agusan del Sur ang autopsy result sa Scene of the Crime Operatives kon SOCO sa napalgang kalabera nga gi-claim sa mga kabanay nga iya matud pa sa magtutudlo sa Paciencia Elementary School sa Brgy. San Vicente nga na-missing niadto pang Enero 16 ning tuiga.
Sigon ni Police Senior Master Sergeant kon PSMS Moher Salas sa Loreto Municipal Police Station, gi-ila sa mga kabanay ang kalabera nga iya ni Cynthia Gener Dubluis, 26-anyos, dalaga base na sa suot niining pajama og pangtaas.
Napalgan kini dihang nanghinlo sa iyang palm oil farm ang usa ka mag-uuma kondiin duna usa’y kutsilyong nakita sa crime scene.
Sa eksklusibong pakighinabi sa Bombo Radyo Butuan, gipadayag ni PSMS Salas, adiser pa nila kumpirmahon kung ang kalabera iya ba gyod sa maong magtutudlo higayong mugawas na ang resulta sa DNA test og otopsiyang gihimo.
Mahinumdumang naghanyag pa ang lokal nga kagamhanan sa Loreto og sien-mil pesos nga reward sa bisan kinsa nga makatudlo o makahatag ug impormasyon sa nahimutangan sa maestrang si Dubluis.
