BUTUAN CITY – Mu-abot sa kapin 1,800 ka mga pulis ang ipangkatag sa Police Regional Office kon PRO-13 sa mga pampublikong lugar sa kinatibuk-ang Caraga Region karong Holy Week.
Sumala ni PMajor Jennifer Ometer, ang tigpamaba sa PRO-13, paningkamutan nila nga malikayan ang bisan unsa mang dautang panghtabo ilabina karon nga gilauman ang pagdagsa sa mga bakasyonista ug mga turista sa mga pampublikong lugar sama sa mga terminal, airport, ingon man pier ug sa tanang mga places of convergence.
Lakip sa gipangandamang batokan sa kapulisan ang pagpangilad, disgrasya sa kadalanan, pagpangawat ug uban pa. Dugang ni Ometer, nakig-alayon na sila sa mga lokal nga kagamhanan aron magbinantayon karong Holy Week. Lakip sa ilang gipakusgan ang police visibility sa mga pampublikong lugar aron malikayan ang mga dautang plano sa mga dili maayong elemento.
Subay niini, gipanawagan sa kapulisan ngadto sa publiko nga kinahanglang mamahimo usab nga wise karong panahon sa bakasyon, ilabina kung biyaan ang panimalay.
