BUTUAN CITY – Nangandam na ang Philippine National Police kon PNP alang sa himuong nationwide transport strike sa ngkada-iyang transport groups karong Huwebes, Marso 19.
Sigon ni PNP spokesperson PBGen Randulf Tuaño, naghatag na og direktiba si PNP Chief General Jose Melencio Nartatez Jr ngadto sa kadumalahan sa National Capital Region Police Office aron making-alayon sa mga grupong nagtakdang magprotesta ug duna’y himuong programa.
Kini aron masigurong igo ang deployment sa kapulisan sa maong adlaw apil na ang ilang mobility assets sa ingon duna’y masakyan ang publiko ug dili mahasol ang ilang mga mga lakaw ug trabaho sa maong adlaw.
Samtang subay na usab sa padayon nilang paglibot ug pag-monitor sa mga gasoline stations, gipadayag sa opisyal nga padayon silang makig-alayon sa Department of Energy kon DOE aron magsubmite sa log sa ilang inventory sa mga na-inspekyon nilang mga gasolinahan.
Sa pagkakaron, wala pa’y nakasuhan o kaha napahamtangan og aksyon tungod sa mga posibleng hoarding ingon man paturagas nga pagsaka sa presyo sa mga produktong petrolyo.
Giklaro pa ni Tuaño nga kinahanglan nila ang taga-DOE tungod kay wala’y kasayuran ang kapulisan sa hoarding ingon man sa pagpasaka sa presyo sa mga produktong petrolyo.
