BUTUAN CITY – Dismayadong gipasibaw dinhi sa Bombo Radyo Butuan ni Ampayon, Butuan City OIC Brgy. Kapitan Danilo Maisog ang langay nga pag-apruba sa ilang gisubmiteng mga dokumento alang sa pag-apruba unta sa gikinahanglan niyang fidelity bond aron makalihok na sila financially.
Sa eksklusibong pakighinabi sa Bombo Radyo Butuan, gipadayag ni Kapitan Maisog nga sukad nasuspende si Kapitan Rodencio Basubas ning mi-aging buwan, niadto pang mi-aging Miyerkules, Septembre 9 siya nahatagan og kagahom aron magsilbing barangay kapitan sa Ampayon.
Nasayrang human siya gitudlong OIC kapitan human gisuspende si Kapitan Basubas, nagsubmite gilayon siya og mga dokumento ngadto sa buhatan ni Mayor Ronnie Vicente Lagnada aron mapirmahan na ang ilang fidelity bond niadto pang Agustol 24 apan hangtud sa pagkutlo niini nga balita, wala pa siya’y nadawat nga tubag partikular na, sa unta na-uli na nga mga dokumentong duna’y pirma sa mayor.
Nabalaka na si Kapitan Maisog tungod kay dili sila makalihok tungod sa kawala’y kwartang magamit alang sa pag-purchase nila og mga office supplies ilabina nga hurot-hurot na ang ilang bond paper ug posibleng maputlan pa sila og linya sa kuryente nga samot nga makabalda pa sa ilang operasyon.
Hinuon, ang iyang nadawat mao ang memorandum nga pirmado ni City Mayor’s Office manager Piencenavez nga nag-notify sa pagbabag ni kanhi Kapitan Felix Dennis Gonzaga nga mapirmahan ang fidelity bond.
Tungod niini, gikwestyon ni Kapitan Maisog ang pag-entertain sa City Mayor’s Office sa pagbabag ni Gonzaga taliwa nga wala na kini posisyon sa barangay council gawas nga ma-apektuhan usab niini ang serbisyong angayang ihatag sa barangay council ngadto sa katawhan sa maong barangay.
Aminado ang kapitan nga wala siya’y ideya kung naka-abot ba kang Mayor RCL ang maong dokumento o wala tungod kay kada-follow up niya sa City Hall, dili man siya pasudlon tungod sa pag-obserba sa health protocols ug bugtong mahimo lamang mao ang pagdawat ug pagtatak sa mga dokumentong iyang ipanghatud.
Tungod niini mi-apela siya kang Mayor Lagnada nga isip amahan sa siyudad, unta pirmahan na niini ang ilang fidelity bond aron makahatag na siya og serbisyo ngadto sa katawhan sa Brgy. Ampayon.
