BUTUAN CITY – Nahatagan na og temporaryong kagawasan si Ampayon, Butuan City Brgy. Kapitan Rodencio Basubas Jr. human nakapyansa sa gihapak kaniyang kasong estafa.
Ang maong kaso, gikatingala sa kapitan tungod kay mao kini ang gibasehan sa nasobrahan matud pa nga pag-entrap kaniya tungod sa kapin 20 ka mga pulis nga midalikyat sa iyang buhatan taliwa sa kamatu-urang mamahimo ra siyang istoryahon niini ilabina nga public office ang lugar diin siya gi-entrap.
Sa eksklusibong pakighinabi sa Bombo Radyo Butuan, gipadayag ni Kapitan Basubas nga daw gipanawong sa mga otoridad kaniya nga usa siya ka high-risk nga indibidwal aron dalhan og mga armadong otoridad taliwa nga mamahimo unta matud pa siyang imbitahan kung duna’y nagreklamo batuk kaniya.
Aminado ang kapitan nga atol sa pag-raid sa iyang buhatan, kahilakon sya apan iya lang kining gipugngan.
Apan paglabay na sa ikaduha ug ikatulong adlaw, wala na niya mapugngi ang pagtulo sa iyang luha ilabina nga igo lang siya mitabang aron dili ma-forfeit ang Memorandum of Agreement kon MOA nga gipirmahan sa kanhi kapitan nga si Dennis Felix Gonzaga ug sa tag-iya sa yuta tungod sa wala pagsunod sa kanhi administrasyon sa nakalatid sa MOA nga bayaran nila ang pamilya Briones sa onse ka installment basis.
Kini human unang nakabayad og 3.2-milyunes pesos ang barangay samtang ang balance, bayran kada-unom ka buwan og 500-mil pesos hangtud nga matapos na ang onse ka nasabutang installment.
Bisan matud pa si Dra. Briones dismayado sa iyang nadangatan gumikan kay siya ang mitabang aron dili maala-ot ang mga tawong nakatukod na og balay sa maong yuta pinaagi sa pagpangita sa kantidad nga gipangayo sa mga Briones aron lang dili kini ma-forfeit.
Tungod kay sa gawas sa nasud operahan ang bana ni Briones, siya ang gitugutan sa pamilya nga mukolekta sa bayad uban sa acknowledgement receipt nga maoy pruweba sa bayad apan mao usa’y gibasehan sa pag-raid kaniya.
