BUTUAN CITY – Nabitik sa gilusad nga buybust operation ang gikonsiderang newly identified nga drug pusher nga nakuhaan ug kapin usa ka milyon ka kantidad sa illegal nga drugas alas 8:30 kagabii sa may Barangay J.P. Rizal ning siyudad sa Butuan.
Naila ang suspetsadong si Gelmar Alinabon Gozon, 37-anyos, menyu ug residente sa P-3, Barangay Cabinet, Cabadbaran City.
Sigon ni Police Insp. Joel Amado sa Butuan City Police Station-5, nakadawat sila ug impormasyon nga dunay magtagak ug drugas sa Barangay Amparo ilabina sa kapistahan karung adlawa hinungdang ila kining gipapalitan sa ilang operatiba.
Nakuha sa posisyon sa suspek ang 4 ka tag-as nga sachet nga dunay sulod sa gidudahang shabu nga mitimbang ug 100 gramos ug market value nga 1.1 milyones pesos.
Sa karun gi-andam na ang kasong ipasaka batuk sa suspek nga gikustudiya karun sa Butuan City Police Station-5 alang sa tukmang disposasyon.
