BUTUAN CITY – Gipasalamatan usab ni Jacinto Tanduyan, Regional coordinator sa Kilusang Mayo Uno kon KMU-Caraga ang tanang kapulisan ning siyudad sa Butuan nga mihatag ug pagrespetu sa ilang gihimung rally kagahapong adlawa.
Kini bisan paman nga dunay nalangay nga mga kaubanan nila gikan pa sa layung dapit ning rehiyon tungod sa gihimung checkpoints sa militar ug kapulisan, diin gipakanaog ang mga mosalmot sa rally og gipa-attendance.
Gane dunay mga kaubanan niining miabot sa venue alauna na sa hapon.
Sa pagbana-bana niini, muabot lang sila sa kapin usa ka libo, ang nag-rally nga kulang kaayu sa target nilang duha ka libo ka partisipante.
Samtang gikalipay usab ni Tanduyan ang hingpit nga pagpirma sa executive order kon EO nga magtapos unya sa contractualization.
Sumala pa niini, nga usa ka ang-ang na kini sa ilang kalampusan dungan sa pag-angkon nga wala pa sila makabasa sa unod sa maong executive order.
Gihulat pa nila karun ang kopya aron kini ilang makumpara sa gi-andam nga EO sa niaging tuig.
