BUTUAN CITY – Nagmalampuson ang ceremonial burning og pagguba sa mga ginadiling druga nga ebidensya sa nadesisyunan nang 31 ka mga kaso sa Regional Trial Court sa Caraga Region nga gipahigayon sa ground sa Camp Rafael Rodriguez kaganinang buntag.
Pagpanguna sa Philippine Drug Enforcement Agency kon PDEA-Caraga dungan sa ilang ika-15 nga anibersaryo, kapin sa 3-milyones pesos nga kantidad sa shabu og marijuana ang gisunog sulod sa maong kampo.
Bisan og wala’y kompletong data, gipaneguro ni PDEA-Caraga regional director Ailyn Lovito nga malampuson ang ilang kampanya batuk sa ginadilinh druga tungod sa taas nga conviction sa mga drug related cases.
Gikumpirma usab ni RTC Judge Emanuel Escatron, nga maayo ang dagan sa mga kaso sa ginadiling druga tungod sa daghang mga nakumbiktong mga akusado og gamay lang ang porsyento sa mga na-dismiss.
Ang pagsunog gisaksihan sa mga sakop sa PDEA-Caraga, mga opisyal ng PNP sa pagpanguna ni Police Chief Supt. Rolando Felix, RTC Judge Emmanuel Escatron, Governor Angel Amante sa Agusan del Norte og sa mga tigbalita. (Beth Ruiz)
