BUTUAN CITY – Dul-an sa 83-mil pesos nga balor sa ginadiling druga ang nakumpiska sa mga sakop sa Butuan City Police Station 3 human ang sunod-sunod nga rondang ilang gihimo kagahapong adlawa.
Pasado alas-3:10 kagahapon sa hapon dihang gihimo ang buy bust operation sa Purok 6-B sa Paradise Village sa Brgy. Libertad ning siyudad nga miresulta sa pagkasikop ni Joel Mapa-Lorzano, 46-anyos, minyo og mulupyo sa maong dapit.
Nakuha gikan sa iyang posisyon ang tulo ka sachets sa suspected shabu nga nagkantidad og 23-mil, 600-pesos uban sa cell phone og 40-pesos nga cash.
Gisundan kini pasado alas-4:20 kagahapon sa hapon nga miresulta usab sa pagkasikop ni Rolly June Abad San Pablo, 32-anyos nga residente sa susamang dapit.
Nakuha usab gikan sa iyang posisyon ang 5-gramos nga suspected shabu nga gibana-banang nagkantidad og 59-mil pesos, usa ka cell phone og mga drug paraphernalia. (Beth Ruiz)
