BUTUAN CITY- Malampusong na-intercept sa joint operatives sa Police Regional Office 13 (PRO13) ang undocumented nga sigarilyo kansang mobalor og kapin P1,565,000 sa Lianga, Surigao del Sur niadtong Abril 17, 2026.
Ang operasyon gilunsad human sa tip gikan sa usa ka concerned citizen ug gipangulohan sa 1st Surigao del Sur Provincial Mobile Force Company, Surigao del Sur Special Operations Group, Regional Intelligence Division 13, ug Lianga Municipal Police Station, uban sa koordinasyon sa Bureau of Customs (BOC), Bureau of Internal Revenue (BIR), ug Department of Trade and Industry (DTI) sa Tandag City.
Nasakmit ang 50 ka box nga smuggled cigarettes nga naglangkob sa 21 ka box sa red Casablanca nga adunay 40 ka reams matag kahon ug 29 ka kahon sa Cannon nga puti ug green nga adunay 25 ka reams matag kahon. Ang kontrabando nadiskubre atol sa routine inspection sa usa ka courier service facility diin nakita nga walay BIR tax stamps ang mga pakete.
Nasuta nga gikan sa Zamboanga del Sur ang mga parcels ug alang unta sa usa ka recipient nga giila lang sa alyas “Baj” kansa nakalikay sa pagdakop. Ang tanan nga items gi-inventory ug anaa na sa kustodiya sa kapulisan samtang padayon ang hot pursuit operation aron madakpan ang suspek ug mahibal-an ang uban pang nalambigit sa iligal nga kalihukan.
