BUTUAN CITY – Gibana-banang mokantidad sa kapin 700-mil pesos ang ilegal nga drugas nga nakumpiska sa gikasang buy-bust operation kaganinang alas 7:45 sa buntag sa may Purok 8, Tinago, Brgy. Matabao, Buenavista, Agusan del Norte.
Gihimo ang maong operasyon sa mga ginsakpan sa Regional Intellegence Division 13 sa Police Regional Office kon PRO-13 batuk sa suspek nga si Jessie Gola Jumawan, 40 anyos nga gikonsiderang high value target, ulitawo ug nagpuyo sa Purok-9, Sitio Tawilon, Brgy. Ambago, Butuan City.
Nakuha gikan sa posisyon sa suspetsado ang unom ka sachet nga duhay sulod sa gitoohang shabu og mitimbang sa 110 gramos nga mikantidad sa 748-mil pesos. Lakip sa nakumpiska ang nagkadaiyang drug paraphernalia, usa ka libo ka pesos nga marked money og 31 ka book nga tag-usa ka libo nga boodle money.
Nasayran nga kanhe nang nadakpan ang suspetsado niadtong 2018 gumikan sa ilegal nga drugas og nakagawas sa tuig 2021.
Apan nasuta sa monitoring sa kapulisan nga mibalik kini sa pagpamaligya rasong gikasa ang operasyon. Sa karun gi-andam na ang kasong may kalapasan sa RA 9165 nga ipasaka batuk sa suspetsado.
