BUTUAN CITY – Misaka na sa 51 ka mga tawo ang gikatahong napatay human nga ang gisakyang bus milahos gikan sa usa ka highway ngadto sa usa ka hugaw kaayu nga pangpang sa Guatemala City, lunes sa buntag oras sa maong nasud.
Sigon sa tigpamaba sa fire department ang maong bus nga puno sa mga tawo nagbiyahe padulong sa kaulohan gikan sa lungsod sa San Agustin Acasaguastlan sa dihang kini nahulog sa gibana-bana nga 20 metros gikan sa Puente Belice, usa ka tulay nga motabok sa usa ka dalan ug sapa.
Sumala ni Carlos Hernandez, nga gidala na sa morgue ang patay’ng lawas sa 36 ka mga lalaki ug 15 ka mga babaye.
Makita sa mga hulagway nga gipa-ambit sa social media ang bus nga nahumol sa hugaw nga tubig nga gipalibutan sa mga lawas sa mga biktima.
Subay niini, nagdeklara na si Guatemalan President Bernardo Arevalo og tulo ka adlaw nga nasudnong pagsubo samtang gi-deploy ang kasundaluhan aron mo-asister sa pagresponde.
