BUTUAN CITY – Nakatala ang Provincial Veterinary Office sa Negros Occidental og kinatibuk-ang 3,421 ka mga hayop nga namatay isip epekto sa pagbuto sa bulkang Kanlaon.
Ang maong mga hayop gidudahang naapektuhan sa lapad nga ashfall nga natigayon human ang pagbuto ug taas nga sulfur dioxide emission sa maong bulkan.
Dugang sa ahensya, mi-abot sa kinatibuk-ang 3,210 ka mga manok ang namatay samtang ang nabahiling 211,gilangkuban sa mga baka, kabaw, kanding, baboy, ug karnero.
Migawas usab sa ilang mga pagsusi nga duna’y respiratory infection ug problema sa pagkaon o digestive problem ang mga mananap tungod sa pagkalanghab nila ug sa taas nga exposure sa sulfur.
Madumdumang human ang ‘pagbuto sa bulkan, pipila ka mga veterinary medical missions ang gihimo sa mga barangay aron matambalan ang sakit sa mga hayop nga posibleng nakuha human ang pagbusikad.
