BUTUAN CITY – Kapin sa 300 ka mga tricycle units ning siyudad sa Butuan ang muhatag og libreng sakay sa mga estudyante isip suporta sa mga ginikanan subay na usab sa pormal nga pag-abli sa school year 2024-2025.
Sigon ni Wilfredo Ybañez Jr., presidente sa Butuan United Tricycle Federation, ang mga traysikol nga nagbiyahi-an sa nagkada-iyang ruta ning siyudad, misaad nga mu-uban sa ilang libreng sakay dungan sa pagklaro nga boluntaryo lamang kini.
Dili matud pa kini bag-o nga serbisyo sa ilang grupo tungod kay kada-tuig ila kining ginahimo ilabina sa buwan sa Disyembre kansa pito ka tuig na nilang gipatuman.
Gihimo usab nila kini matag duna’y dakong kalihukan nga i-host ang dakbayan sa Butuan sama niadtong Teachers’ Congress kondiin libre nilang gipasakay ang mga magtutudlo rason nga karong pag-abli sa klase, didto na usab nila kini ihatag sa mga estudyante.
Hinuon iyang giklaro nga wala pa’y misaad nilang mga ka-ubanang nagbiyahi-an sa sentrong bahin ning siyudad ang muhatag og libreng sakay.
Dako ang pagpasalamat sa opisyal ngadto sa iyang mgaka-ubanan sa pagsanong sa iyang hangyo tungod kay sa sinugdanan, wala’y misanong niini hangtud nga ilang nasabtan ang halangdong tumong niini kansa dakong tabang dili lang sa mga estudyante kondili apil na sa mga ginikanan.
Kini taliwa nga wala’y bisan piso lang nga take-away nga ipahinungod ngadto sa muhatag og libreng sakay sa mga estudyante.
