BUTUAN CITY – Kapin sa 2,000 ka mga journalists gikan sa nagkada-iyang nasud sa kalibutan ang anaa sa St. Peter’s Square uban sa libuang katawhan, ang naghulat sa resulta sa conclave kon pagpili sa mga cardinals sa sunod nga Santo Papa.
Sa eksklusibong pakighinabi sa Bombo Radyo Butuan, gipadayag ni Filital Fr Joseph Garrido Capon nga gikan matud pa sa pagsugod sa conclave pinaagi sa concelebration mass sa Basilica sa 133 ka mga cardinals, excited na ang mga tawo nga naghulat sa dagan sa conclave.
Kaganinang pasado alas-tres sa kaadlawon, oras sa Pilipinas, migawas ang unang itom nga aso, timaan nga wala pa’y napiling Santo Papa ang mga cardinals sa unang botohay sa conclave.
Ubay-ubay matud pa nga mga Italyano, mga pari man ug sibilyan, ang nanawag kaniya ug nanghinaut nga unta si Pinoy Cardinal Luis Antonio Tagle ang mapili isip ika-267 nga Santo Papa.
Apan sa pagkakaron, bugtong mahimo matud pa sa tanan, mao ang pag-ampo uban sa mga cardinals nga gipang-padlock-kan sulod sa Sistine Chapel, nga ang mapiling Santo Papa mao kadtong mas mupalambo pa sa Simbahang Katoliko ug sa mga deboto.
