BUTUAN CITY – Mi-abot na sa 11,605 ka mga pamilya kon 39,319 ka mga indibidwal sa entiro Caraga Region ang nanghikling karon sa 59 ka nagkada-iyang evacuation center tungod sa mga pagbaha ug pagdahili sa yuta nga hatud sa wala’y hunong nga pag-ulan tungod usab sa nagtunhay karong shearline.
Sigon ni DSWD-Caraga spokesperson Marco Davey Reyes, sa kanunay, andam ang ilang mga augmentation support alang sa mga biktima sa bisan unsang kalamidad sama sa bagyo, daut nga panahon ug uban pa ug ning panahuna, sigurado na kining magamit.
Sa eksklusibong pakighinabi ning sibyahan, gipadayag niining andam silang muhatag kanunay og ayuda sa manginahanglang local government unit kon LGU ilabina nga ubay-ubay nga mga pamilya na ang apektado sa pagsige og ulan.
Sa kasamtangan, mi-abot sa 52-milyunes, 880-mil 619-pesos ug 43-sentabos nga balor sa family food packs, non-food items ug ang balor 5-milynes pesos nga cash.
