BUTUAN CITY – Gibana-banang muabot sa kapin usa ka milyon ka pesos ang damyos human gilamoy sa kalayu ang usa ka pribadong tunghaan kaganinang buntag sa may Purok-7, Barangay Holy Redeemer ning siyudad sa Butuan.
Nadawat sa Bureau of Fire Protection kon BFP-Butuan ang firecall alas 9:50 sa buntag diin miabot sa 6 ka firetruck ang miresponde sa sunog nga miabot sa ikaduhang alarma.Nadeklarang fire control ang sunog .
Human sa 25 minutos nga pakigkumbate, diin na-ugdaw ang tunghaan nga Divine Seraphim Speech Development and Study Center nga gipanag-iyahan ni Dr. Provenciano Malbar ug gi-abangan ni Norma Abulo.
Sa inisyal nga pakisusi, nagsumikad sa kwarter ang miulbong kalayu nga daling mikuyanap sa ikaduhang andana.
Hinoon wala na makadamay pa sa mga silingan ang maong sunog.
Sa karun, padayon pa ang lawom nga imbestigasyon sa maong insedente aron masuta ang hinungdan sa pag-ulbo sa kalayu.
