BUTUAN CITY – Muabot sa halos usa ka bilyon ka pesos ang gibiling damyos sa agricultura ug imprastraktura sa halapad nga pagbaha sa tibook rehiyon sa Caraga nga dala sa sunod-sunod nga daot sa panahon.
Sa report ngadto kang Public Works and Highways Secretary Mark Villar, gitumbok ni DPWH-Caraga Regional Director Danilo E. Versola nga ang inisyal ug partial nga damyos sa national nga kalsada sa tibook rehiyon miabot na sa 277 milyones pesos.
Sigon ni Versola nga hangtud sa pagkakarun wala pa gihapon nakuha ang pinal nga damyos tungod kay daghan pang mga dalan nga nabahaan pa, particular sa Agusan del Sur.
Samtang nagpagawas na ug inisyal nga assessment ang National Irrigation and Administration kon NIA-Caraga sa nadamyos nilang pasilidad nga muabot na sa kapin 500 milyones pesos ug nadugang pa ang taho sa Department of Agriculture kon DA-13 nga muabot na sa kapin usa ka milyon ka pesos ang partial nga damyos tanom.
Sa laing bahin, gibutyag ni DSWD-13 Regional Director Mita Chuchi G. Lim nga ang tabang nga nahatag sa mga namakwit nga indibidwal muabot na sa kantidad nga 8.1 milyones pesos.
Apan gepaneguro niini nga duna pay stockpile nga muabot sa 17, 437 ka family food packs aron magamit kini isip augmentation support sa lokal nga kagamhanan.
