BUTUAN CITY – Gireklamo ni Liza Dino-Esguerra, kanhi chairperson sa Film Development Council of the Philippines (FDCP), ang pagkawala matud pa sa iyahang mahalong relo ug laptop gikan sa iyang gi-check-in nga bagahe pag-abot niini sa Ninoy Aquino International Airport (NAIA) niadtong Miyerkules, Marso 28, 2025.
Sumala ni Dino-Esguerra, kinsa partner karon ni Aiza ”Ice” Seguerra nga wala dayon niini masusi ang sulod sa iyahang maleta dihang nakaabot kini siya sa ilahang balay. Ug dihang giablihan niini ang maong bagahe, wala na ang nasangpit nga mga butang.
Sumala usab ni Ice Seguerra nga ilang namatikdan nga dunay samad ang maleta nga daw tinas-tasan sa kutsilyo. Gipasabot usab ni Dino-Esguerra nga iyang gisulod ang mga butang sa checked luggage tungod sa limitasyon sa gibug-aton sa mga dala niini.
Apan sumala sa mga airport authorities nga wala matud pay ebedensya nga makapaklaro sa nasangpit nga alegasyon. Dugang niini nga bayaran matud pa nila ang relo sa kapares ni Ice apan dili na ang laptop.
