BUTUAN CITY – Bisan pa man sa dakong kantidad nga wala pa mauli kanila human gi-invest sa Kabus Padatuon Community Ministry International Inc. kon KAPA-Butuan, mapasalamaton gihapon ang mga KAPA members nga gipahunong na ni Pangulong Rodrigo Duterte ang operasyon niini.
Sa eksklusibong pakighinabi sa Bombo Radyo Butuan ngadto sa nagsilbing tigpamaba sa upat ka mga KAPA members nga midangop ning sibyahan, gibutyag ni alyas Langga – taga-Loreto, Agusan del Sur nga pinaagi sa pagsanta na ni Pangulong Duterte sa maong investment scheme, nasanta usab niini ang pagtudlo sa KAPA kanila nga mahimong tapulan.
Gi-orient matud pa silang dili na mutrabaho o kaha muhimo sa ilang inadlaw nga panginabuhian og maghuwat na lang sa ilang payout.
Karon nga sirado na og daghan pa ang wala makabawi sa ilang gi-invest nga kwarta, balik na usab sila sa ilang na-andang panginabuhian sama sa pagkatkat og lubi og uban pa.
Mensahe usab niya kang KAPA founder Joel Apolinario nga unta mahuna-hunaan niini ang iyang gihimong pagpangilad sa mga tawo taliwa sa iyang pagpa-ilang usa siya ka pastor.
Natingala siya kung gi-unsa niini pagsabot ang nakalatid sa Bibliya nga iya man kining nahimo sa libu-ang katawhan. Uban sa pangaliya sa Kahitas-an, iyang gipanghinaut nga unta magiyahan ang maong pastor nga mabalik sa katawhan ang iyang gikuha kanilang kwarta.
