BUTUAN CITY – Dayag nga nagpahimangno ang Securities and Exchange Commission kon SEC batuk sa KAPA Community Ministry International tungod sa ilang padayong pagpangolekta og investment money o ba kaha donasyon taliwa sa gipagawas nila nga Cease and Desist Order kon CDO.
Nasayrang base sa CDO sa SEC, nasutang nangolekta ang KAPA og donasyon og gisaaran ang mga miyembro og 30 porsyentong interest kada-buwan rason nga makonsidera gihapon kining investment apan ang ilang produkto, dili rehistrado sa SEC.
Sa interview sa Bombo Radyo, gibutyag ni Commission Secretary Atty. Armando Pan Jr. nga posibleng mag-atubang og kasong sibil og kriminal ang mga lider sa KAPA kung padayon silang mangolekta og investment money, depende sa mamahimong resulta sa pagdungog.
Sigon ni Atty. Pan, nagduso na og entry of appearance ang abugado sa KAPA og itakda ang pagdungog aron makuha ang ilang panig alang sa patas na imbestigasyon.
Sa pagkakaron, padayon ang monitoring sa SEC diha sa ilang mga buhatan sa Davao, Cagayan de Oro og Zamboanga kalabot sa kalihukan sa KAPA.
Gidugang pa ni Atty. Pan nga kung donasyon ang gikolekta sa KAPA, kinahanglan nilang magbayad og donors’ tax.
Subling nagpahimangno ang opisyal sa mga posibleng madani sa KAPA nga mukunsulta una sa SEC sa Mindanao aron magiyahan og dili mawaldas ang kwartang ilang gihagu-an ilabina sa investent scheme nga dili rehistrado og otorisado. (Beth Ruiz)
